Ndryshimet në sistemin e taksave dhe tarifave vendore për bizneset në Tiranë për vitin 2026
Në vitin 2025, Këshilli Bashkiak i Tiranës miratoi Vendimin Nr. 59, datë 24.07.2025 (shih me ë poshteë), i cili sjell disa shtesa dhe ndryshime në vendimin ekzistues për sistemin e taksave dhe tarifave vendore në qytetin e Tiranës. Këto ndryshime kanë për qëllim përmirësimin e administrimit të detyrimeve vendore, rritjen e përdorimit të komunikimit elektronik me tatimpaguesit, si dhe përshtatjen e disa tarifave dhe lehtësirave për kategori të caktuara biznesesh dhe organizatash. Në vijim paraqiten në mënyrë të përmbledhur ndryshimet kryesore që lidhen me mënyrën e njoftimit të tatimpaguesve, nivelin e disa taksave vendore, tarifën e pastrimit dhe lehtësirat e reja për disa kategori subjektesh.
Ndryshimet në sistemin e taksave dhe tarifave vendore për bizneset në Tiranë (Vendimi Nr. 59, datë 24.07.2025)
Mënyra e njoftimit të tatimpaguesve
Në vendim është shtuar një nen i ri që përcakton mënyrën e njoftimit të tatimpaguesve nga Bashkia. Çdo njoftim që lidhet me detyrimet për taksat dhe tarifat vendore mund të bëhet jo vetëm përmes shërbimit postar, por edhe në mënyrë elektronike. Njoftimet mund të dërgohen përmes komunikimeve elektronike ose nëpërmjet portalit qeveritar e-Albania. Ky ndryshim synon të lehtësojë komunikimin me bizneset dhe të rrisë përdorimin e shërbimeve digjitale.
Taksa e ndikimit në infrastrukturë për ndërtime me qëllim publik
Në nenin që rregullon bazën dhe nivelin e taksës së ndikimit në infrastrukturë është shtuar një dispozitë e re. Për ndërtime që realizohen për qëllime publike dhe ku pronësia e objektit përfundimtar do të jetë shtetërore, taksa e ndikimit në infrastrukturë përcaktohet në nivelin 2 për qind të vlerës së investimit. Ky ndryshim lidhet kryesisht me projekte ndërtimi të realizuara nga kompani ndërtimi për institucione publike.
Lehtësira për disa kategori biznesesh nga taksa për infrastrukturën arsimore
Vendimi parashikon lehtësira të reja nga taksa e përkohshme për infrastrukturën arsimore. Bizneset e krijuara nga gra kryefamiljare që kanë tre ose më shumë fëmijë përfitojnë ulje në masën 50 për qind të kësaj takse, me kusht që pranë drejtorisë përkatëse të dorëzohet certifikata familjare dhe ekstrakti historik i regjistrit tregtar që vërteton të dhënat e subjektit. Gjithashtu nga kjo taksë përjashtohen shoqatat e themeluara nga pensionistë ose nga persona me aftësi të kufizuara, të cilat duhet të paraqesin vendimin e gjykatës për regjistrimin e shoqatës dhe dokumentin që vërteton statusin përkatës.
Ndryshime në tarifën e pastrimit
Vendimi ndryshon aneksin që përcakton tarifat e pastrimit për familjarët dhe bizneset. Tarifat vazhdojnë të diferencohen sipas kategorisë së aktivitetit ekonomik dhe sipas nivelit të xhiros vjetore të subjektit. Në aneksin e ri janë rishikuar vlerat për kategori të ndryshme aktivitetesh si tregtia me pakicë, shërbimet, prodhimi, transporti dhe ndërtimi. Për secilin aktivitet tarifa ndryshon në varësi të klasës së xhiros, duke ruajtur strukturën ekzistuese të klasifikimit.
Afati dhe mënyra e pagesës së tarifës së pastrimit për bizneset
Është ndryshuar edhe afati i pagesës së tarifës së pastrimit për kategorinë e biznesit. Detyrimi duhet të paguhet brenda datës 31 maj të çdo viti. Në rastet kur detyrimi lind pas kësaj date, pagesa duhet të kryhet brenda 15 ditëve nga momenti i lindjes së detyrimit. Për subjektet e regjistruara rishtaz, detyrimi llogaritet nga muaji i regjistrimit të biznesit pranë Qendra Kombëtare e Biznesit dhe aplikohet për çdo njësi ku subjekti ushtron aktivitet.
Tarifa e pastrimit për kantieret e ndërtimit
Një ndryshim tjetër lidhet me mënyrën e llogaritjes së tarifës së pastrimit për kantieret e ndërtimit. Tarifa fillon të llogaritet që nga momenti i zbardhjes së lejes së ndërtimit dhe vazhdon deri në përfundimin e afatit të punimeve të parashikuara në leje. Kjo vlen edhe për rastet kur objekti nuk është vënë ende në përdorim ose kur nuk janë ndjekur procedurat për pajisjen me certifikatë përdorimi.
Lehtësira dhe përjashtime nga tarifa e pastrimit
Vendimi parashikon gjithashtu lehtësira dhe përjashtime të reja nga tarifa e pastrimit. Bizneset e krijuara nga gra kryefamiljare me tre ose më shumë fëmijë përfitojnë ulje në masën 50 për qind të kësaj tarife. Ndërkohë, shoqatat e themeluara nga pensionistë ose nga persona me aftësi të kufizuara përjashtohen plotësisht nga pagesa e tarifës së pastrimit, me kusht që të paraqesin dokumentacionin përkatës që vërteton statusin e tyre.
V E N D I M
Nr.59, datë 24.07.2025
“PËR
DISA SHTESA DHE NDRYSHIME NË VENDIMIN NR.158, DATË 26.12.2019, TË KËSHILLIT BASHKIAK, “PËR SISTEMIN E TAKSAVE DHE TARIFAVE VENDORE NË QYTETIN E TIRANËS”, TË NDRYSHUAR
Në mbështetje të nenit 113, të Kushtetutës, nenit 8, pika 2, nenit 9, pika 1.3, shkronja “b”, nenit 34, pika 3 dhe 4, nenit 35, nenit 54, shkronja “f” dhe nenit 55, pikat 3 dhe 6, të ligjit nr. 139/2015, “Pёr vetëqeverisjen vendore”, të ndryshuar, ligjit nr. 68/2017, “Për financat e vetëqeverisjes vendore”, të ndryshuar, ligjit nr. 9632, datë 30.10.2006, “Për sistemin e taksave vendore”, të ndryshuar, nenit 113, të ligjit nr. 44/2015, “Kodi i Procedurave Administrative i Republikës së Shqipërisë”, ligjit nr. 9920, datë 19.05.2008 “Për procedurat tatimore në Republikën e Shqipërisë”, të ndryshuar, shkresës nr. 236918/1 prot., datë 17.09.2024, të Drejtorisë së Përgjithshme të Taksave dhe Tarifave Vendore, shkresës nr. 161 prot., datë 02.07.2024, të Shoqatës së Ushtarakëve në Rezervë të Shqipërisë, protokolluar pranë Bashkisë Tiranë, me nr. 25989 prot., datë 04.07.2024, shkresës nr. 17490/5 prot., datë 05.06.2025, të Drejtorisë së Përgjithshme të Taksës së Pasurisë, si dhe në vijim të memos nr. 42180 prot., datë 04.11.2024, të Drejtorisë së Përgjithshme të Taksave dhe Tarifave Vendore me propozim të Kryetarit të Bashkisë, Këshilli Bashkiak,
VENDOSI:
Në vendimin nr. 158, datë 26.12.2019, të Këshillit Bashkiak “Për sistemin e taksave dhe tarifave vendore në qytetin e Tiranës”, të ndryshuar, bëhen këto shtesa dhe ndryshime:
1. Në Kreun I “Të përgjithshme”, shtohet neni si më poshtë vijon:
“Neni 3/1
Njoftimi i taksapaguesve
1. Çdo njoftim që lidhet me detyrimet, taskat dhe tarifat vendore do të bëhet përmes shërbimit postar dhe/ ose në rrugë elektronike sipas ligjit për komunikimet elektronike dhe/ ose përmes portalit e-Albania.”
2.Pika 12, e nenit 8, shfuqizohet.
3. Në nenin 23, “Baza dhe niveli i taksës”, bëhet ky ndryshim:
a. Në pikën 3, pas shkronjës a/1, shtohet shkronja a/2, me këtë përmbajtje:
“a/2. Për ndërtime të cilat destinohen për qëllime publike dhe pronësia e objekteve të ndërtuara do të jetë shtetërore, taksa e ndikimit në infrastrukturë është 2 (dy) për qind e vlerës së investimit.”
4. Në nenin 38, “Lehtësira dhe përjashtime”, pas pikës 6, shtohen pika 7 dhe 8, me këtë përmbajtje:
“7. Lehtësohen nga taksa e përkohshme për infrastrukturën arsimore, në masën 50% bizneset e krijuara nga gra kryefamiljare që kanë tre ose më shume fëmijë, vetëm pas depozitimit të certifikatës familjare dhe ekstraktit historik të regjistrit tregtar me të dhënat e subjektit, pranë Drejtorisë së Përgjithshme të Taksave dhe Tarifave Vendore.”
“8. Nga taksa e përkohshme për infrastrukturën arsimore përjashtohen shoqatat e themeluara nga pensionistë ose nga persona me aftësi të kufizuara. Për të përfituar nga ky përjashtim përfaqësuesi juridik i shoqatës depoziton pranë Drejtorisë së Përgjithshme të Taksave dhe Tarifave Vendore, vendimin e gjykatës npërmjet së cilit është regjistruar shoqata dhe dokumentin shoqërues që vërteton statusin e pensionistit apo të personit me aftësi të kufizuara sipas rastit.”
5. Në nenin 41, “Tarifa e pastrimit”, bëhen këto ndryshime:
a. Aneksi i përcaktuar në pikën 2, ndryshohet me ankesin me të njëjtin numër, bashkëlidhur
dhe pjesë përbërëse e këtij vendimi.
b. Pika 3, shfuqizohet.
6. Pika 4, e nenit 42, ndryshohet si më poshtë:
“4. Për kategorinë II. “Biznesi” detyrimi paguhet brenda datës 31 Maj. Afati i pagesës për detyrimet e lindura pas datës 31 Maj është 15 ditë pas lindjes së detyrimit. Për subjektet e regjistruara rishtaz detyrimi tatimor do të llogaritet për çdo njësi ku subjekti kryen aktivitet nga muaji korrent i regjistrimit pranë Qendrës Kombëtare të Biznesit”.
7. Shkronja “ii”, e pikës 6, në nenin 42 “Mënyra e pagesës së tarifës së pastrimit”, ndryshon si më poshtë vijon:
“ii. Njësi ndërtimi për çdo kantier ndërtimi, etj të ngjashëm me to, rikonstruksione të pjesshme të ngjashme me to, për të cilat miratohet leje ndërtimi por nuk vihet në zbatim/shfrytëzim nga zhvilluesi/ndërtuesi deri në përfundim të afatit të lejes, si dhe për rastet të cilat leja e miratuar vihet në zbatim por nuk janë ndjekur procedurat për aplikimin për certifikatë përdorimi, llogaritja e tarifës se pastrimit të fillojë me zbardhjen e lejes së ndërtimit deri në përfundimin e afatit të punimeve, shoqëruar me procesverbalin nga sektori i verifikimit në terren”.
8. Në nenin 43, “Lehtësira dhe përjashtime”, pas pikës 3, shtohen pika 4 dhe 5, me këtë përmbajtje:
“4. Lehtësohen nga tarifa e pastrimit në masën 50%, bizneset e krijuara nga gra kryefamiljare që kanë tre ose më shumë fëmijë, vetëm pas dorëzimit të certifikatës familjare si dhe ekstraktit historik të regjistrit tregtar për të dhënat e subjektit, pranë Drejtorisë së Përgjithshme të Taksave dhe Tarifave Vendore.”
“5. Përjashtohen nga tarifa e pastrimit shoqatat e themeluara nga pensionistë ose persona me aftësi të kufizuara. Për të përfituar nga ky përjashtim përfaqësuesi juridik i shoqatës depoziton pranë Drejtorisë së Përgjithshme të Taksave dhe Tarifave Vendore, vendimin e gjykatës npërmjet së cilit është regjistruar shoqata dhe dokumentin shoqërues që vërteton statusin e pensionistit apo të personit me aftësi të kufizuara sipas rastit.”
9. Në kreun XV, “Tarifat për Muzeun Vendor “Shtëpia Studio Kadare” bëhet ky ndryshim:
a. Togfjalëshi Muzeu Vendor “Shtëpia Studio Kadare” kudo në këtë kre zëvendësohet me “Shtëpia Studio Kadare-Agolli”.
10. Ngarkohen Drejtoria e Përgjithshme e Menaxhimit Financiar, Drejtoria e Përgjithshme e Planifikimit dhe Zhvillimit të Territorit, Drejtoria e Përgjithshme Juridike e Aseteve dhe Licensimit, Drejtoria e Përgjithshme e Taksave dhe Tarifave Vendore dhe Shtëpia Studio Kadare-Agolli, për zbatimin e këtij vendimi.
Ky vendim hyn në fuqi sipas përcaktimeve të pikës 6, të nenit 55, të ligjit nr.139/2015, “Per vetëqeverisjen vendore”, të ndryshuar.
K R Y E T A R