Tatimi në burim
Çfarë përfaqëson?
Tatimi në burim është një tatim që mbahet drejtpërdrejt nga pagesa e të ardhurave në momentin e kryerjes së saj, pra nga vetë burimi i të ardhurave, pa pritur deklarimin e tatimpaguesit. Ai zbatohet mbi kategori të caktuara të ardhurash si dividentët, qiratë, honoraret, pagesat për jorezidentët dhe shërbime të tjera, duke u derdhur menjëherë në buxhetin e shtetit nga paguesi i të ardhurës. Ky tatim siguron mbledhje të menjëhershme të të ardhurave, duke reduktuar rrezikun e evazionit fiskal. Ai thjeshton administrimin tatimor, pasi mblidhet në momentin e pagesës, dhe barazon trajtimin fiskal mes subjekteve vendase dhe atyre jorezidente, duke shmangur zhvendosjen e fitimeve. Tatimi në burim është një instrument i rëndësishëm i të ardhurave tatimore direkte dhe kontribuon me rreth 5–7% të totalit të të ardhurave tatimore në buxhetin e shtetit, duke qenë një burim i qëndrueshëm dhe i parashikueshëm.
Mënyra e llogaritjes
Tatimi në burim në Shqipëri llogaritet duke mbajtur një përqindje të caktuar mbi pagesën e të ardhurës në momentin e kryerjes së saj dhe normat kryesore për vitin 2025 janë: dividentët 8%, ndërsa qiratë, honoraret, shërbimet profesionale, interesat bankare, pagesat për jorezidentë dhe lojërat e fatit tatohen me 15%. Përqindja përkatëse aplikohet mbi shumën bruto të pagesës dhe tatimi mbahet nga paguesi i të ardhurës, që mund të jetë kompania, institucioni ose individi që kryen pagesën, duke u derdhur menjëherë në buxhetin e shtetit.
Afatet dhe periudhat e pagesës
Tatimi në burim në Shqipëri ka periudhë tatimore mujore, çdo pagesë e tatueshme raportohet për muajin kur kryhet, afati i deklarimit dhe pagesës është deri më datën 20 të muajit pasardhës dhe tatimi mbahet nga paguesi i të ardhurës duke u derdhur në buxhetin e shtetit
Mënyra e pagesës
Pasi të pajiseni me Urdhërpagesën nga studio e kontabilitetit, pagesën mund ta kryeni pranë të gjitha bankave të nivelit të dytë, në Postën Shqiptare, si edhe në institucionet financiare të licencuara, si Easypay, AK-Invest, Unionnet – Western Union, etj., duke skanuar barkodin e Urdhërpagesës.